Ilbieraħ membru tal-Moviment Graffitti u attivist fil-Kamp Emerġenza Ambjent għamel żjara ġewwa Bulebel (Alex Caruana), flimkien ma’ numru ta’ persuni minn għaqdiet oħra u bdiewa li jaħdmu r-raba’ t’hemmhekk. Dawn huma wħud mir-ritratt li ħa ta’ dan il-post daqstant sabiħ li se jkun qed jinqered jekk tgħaddi l-proposta sabiex tiġi estiża ż-żona industrijali. Il-bdiewa ilhom jaħdmu din l-art għal mijiet ta’ snin u f’din iż-żona hemm iktar minn 80 siġra tal-ħarrub (li hija siġra protetta bil-liġi).
Huwa possibbli li lesti neqirdu darb’għal dejjem post bħal dan? Huwa possibbli li lesti ntellfu x-xogħol lil bdiewa li ilhom jaħdmu din l-art għal ġenerazzjonijiet sħaħ? Dan meta pajjiżna huwa mimli b’siti mibnijn u abbandunati.
Din sempliċiment ġennata! Biċċa biċċa, qed neqirdu l-futur tagħna fuq din il-gżira.
Aħna nagħtu l-appoġġ kollu tagħna lill-bdiewa li qed jirreżistu din il-proposta. Ma jistax ikun li f’pajjiżna neqirdu kull roqgħa art li tagħtina l-ħajja. B’din ir-rata, se nispiċċaw deżert f’qasir żmien.
Membri tal-Moviment Graffitti u attivisti fil-Kamp Emerġenza Ambjent se jkunu qed jattendu għal-Laqgħa Pubblika organizzata mill-Kunsill Lokali taż-Żejtun sabiex juru d-diżapprovazzjoni tagħhom lejn dan il-proġett. Il-laqgħa se ssir il-Kunsill Lokali, illejla fis-6pm. Inħeġġukom tattendu u ssemmgħu leħenkom intom ukoll!
